ഷഷ്ഠാഷ്ടമഗതശ്ചന്ദ്രസ്ഥാനാദ്ദേവപുരോഹിതഃ
കേന്ദ്രാദിതരഗോ ലഗ്നാദ്യോഗശ്ശകടസംജ്ഞിതഃ
സാരം :-
ചന്ദ്രൻ നിൽക്കുന്ന രാശിയുടെ ആറാം ഭാവം, എട്ടാം ഭാവം എന്നീ ഭാവങ്ങളിൽ വ്യാഴം നിൽക്കുകയും ആ വ്യാഴം നിൽക്കുന്ന രാശി ലഗ്നം നാലാം ഭാവം, ഏഴാം ഭാവം, പത്താം ഭാവം എന്നീ ഭാവങ്ങളല്ലാതെ വരികയും ചെയ്താൽ ശകടയോഗം അനുഭവിക്കും. ഇവിടെ " ഷഷ്ഠാഷ്ടവ്യയഗശ്ചന്ദ്രാൽ " എന്നുള്ള പാഠാന്തരമനുസരിച്ച് ചന്ദ്രൻ നിൽക്കുന്ന രാശിയുടെ പന്ത്രണ്ടാംഭാവംകൂടി കണക്കാക്കാമെന്നുണ്ട്.
രാജവംശോത്ഭവോ വാപി നിസ്സ്വശ്ശകടയോഗജഃ
ക്ലേശായാസവശാന്നിത്യം സന്തപ്തഃ ക്ഷിതിപപ്രിയഃ
സാരം :-
ശകടയോഗത്തിൽ ജനിക്കുന്നവൻ രാജകുലത്തിൽ ജനിച്ചവനായിരുന്നാലും കേവലം ദരിദ്രനായും ദുഃഖവും ആയാസവും നിമിത്തം എപ്പോഴും പീഡിതഹൃദയനായും രാജസേവകനായും ഭവിക്കും.