ദൃശ്യാർദ്ധഹരണത്തിന്റെ ക്രിയ

സർവ്വാർദ്ധത്രിചരണപഞ്ചഷഷ്ഠഭാഗാഃ

ക്ഷീയന്തേ വ്യയഭവനാദസത്സു വാമം

സത്സ്വര്‍ദ്ധം ഹ്രസതി തഥൈകരാശിഗാനാ-

മേകോംശം ഹരതി ബലീത്യഥാഹ സത്യഃ

സാരം :-

ലഗ്നത്തിൽ നിന്ന് പന്ത്രണ്ടാം ഭാവത്തിൽ ഒരു പാപഗ്രഹം നിൽക്കുന്നുണ്ടെങ്കിൽ അതിന്നു മുമ്പ് മൂന്നു ഹരണങ്ങളും കഴിച്ചുവെച്ചിരിയ്ക്കുന്ന ദശ മുഴുവനും കളയണം. ആ പന്ത്രണ്ടാം ഭാവത്തിൽ നിൽക്കുന്നത് ഒരു ശുഭഗ്രഹമാണെങ്കിൽ ആ ദശയുടെ പകുതി മാത്രമേ കളയുകയും വേണ്ടൂ. ഇങ്ങനെ ലഗ്നാൽ പന്ത്രണ്ടാം ഭാവത്തിൽ നിൽക്കുന്ന പാപഗ്രഹത്തിന്റെ ദശയുടെ പകുതിയും, ടി സ്ഥാനത്തു നിൽക്കുന്ന ശുഭഗ്രഹത്തിന്റെ ദശയുടെ നാലിലൊന്നും, പത്താം ഭാവത്തിലെ പാപഗ്രഹത്തിന്റെ ദശയുടെ മൂന്നിലൊന്നും, ശുഭഗ്രഹത്തിന്റെ ദശയുടെ ആറിലൊന്നും, ഒമ്പതാം ഭാവത്തിലെ പാപഗ്രഹത്തിന്റെ ദശയുടെ നാലിലൊന്നും, ടി സ്ഥാനത്തുള്ള ശുഭഗ്രഹത്തിന്റെ ദശയുടെ എട്ടിലൊന്നും, എട്ടാം ഭാവത്തിലെ പാപഗ്രഹത്തിന്റെ ദശയുടെ അഞ്ചിലൊന്നും, ടി സ്ഥാനത്തുള്ള ശുഭഗ്രഹത്തിന്റെ ദശയുടെ പത്തിലൊന്നും, ലഗ്നാൽ ഏഴാം ഭാവത്തിൽ നിൽക്കുന്ന പാപദശയുടെ ആറിലൊന്നും, അവിടെ നിൽക്കുന്ന ശുഭദശയുടെ പന്ത്രണ്ടിലൊന്നും മുൻവരുത്തി വെച്ച ദശയിൽ നിന്ന് കളയണം. മേൽപ്പറഞ്ഞ പന്ത്രണ്ടാം ഭാവം മുതലായ ഭാവങ്ങളിൽ ഒന്നിൽ തന്നെ ഒന്നിലധികം ഗ്രഹങ്ങൾ നിൽക്കുന്നുവെങ്കിൽ അവരിൽ ബലാധിക്യമുള്ളതിന്നു മാത്രമേ ഈ ദൃശ്യാർദ്ധഹരണം ചെയ്യേണ്ടൂ. മറ്റൊന്നിനും വേണ്ടതില്ലെന്നാണ് സത്യാചാര്യരുടെ അഭിപ്രായം. അതിനാൽ ഈ ഗ്രന്ഥകാരന്റെ അഭിപ്രായവും അതുതന്നെയാണുതാനും. പന്ത്രണ്ടാം ഭാവം, പതിനൊന്നാം ഭാവം മുതലായ ഭാവങ്ങളുടേയും അവയില്‍ നിൽക്കുന്ന ഗ്രഹങ്ങളുടേയും സ്ഫുടങ്ങൾ തുല്യകലകളായി വന്നാലത്തെ ക്രിയയാണ് മുൻപറഞ്ഞത്. തുല്യമല്ലാതെ വന്നാൽ ത്രൈരാശികം ചെയ്തേ സൂക്ഷ്മമാകയുള്ളു. അതു കൂടി താഴെ ചേർക്കുന്നു.

ലഗ്നസ്ഫുടത്തെ വെച്ച് അതിൽ നിന്ന് ഹരണം ചെയ്യേണ്ട ഗ്രഹത്തിന്റെ സ്ഫുടത്തെ വാങ്ങുക. അപ്പോൾ ശേഷിയ്ക്കുന്നത് ആറു രാശിയിൽ കുറയുമെങ്കിലേ ഈ ദൃശ്യാർദ്ധഹരണം ചെയ്യേണ്ടതുള്ളു. അങ്ങനെ ആറു രാശിയിൽ കുറയുമെന്ന് കണ്ടാൽ അതിനെ ഇറക്കി ഇലിയാക്കി വെയ്ക്കുക. അതു ഹാരകമാകുന്നു. "അന്നന്ദേയം" (1800) ഗുണകാരവുമാണ്. ഈ ഗുണകാരത്തേക്കാൾ ഹാരകം കുറയുമെങ്കിൽ "അന്നന്ദേയം" ഹാരകവും, മറ്റേതു ഗുണകാരവുമാകുന്നു. മുമ്പു മൌഢ്യഹരണവും കൂടി കഴിച്ചുവെച്ചിട്ടുള്ള ദശയെ രണ്ടേടത്തുവെച്ച് ഒന്നിനെ 12 ലും 30 ലും 60 ലും പെരുക്കി നാഴികയാക്കി മേൽപ്പറഞ്ഞ ഗുണകാരം കൊണ്ട് പെരുക്കി ഹാരകംകൊണ്ട് ഹരിയ്ക്കുക. കിട്ടിയ ഫലം നാഴികയാകുന്നു. അതിനെ 60 ലും 30 ലും 12 ലും കയറ്റിയാൽ മുകളിലേതു സംവത്സരവും, ചുവട്ടിലെ സ്ഥാനം ക്രമത്താലെ മാസം, ദിവസം, നാഴികകളും ആയി വരുന്നതാണ്. ഈ കിട്ടിയ വത്സരാദിഫലത്തെ വേറെ വെച്ചിരിയ്ക്കുന്ന ദശയിൽ നിന്ന് വാങ്ങുകയും ചെയ്ക. ഇത് പാപനായാലത്തെക്രിയയാകുന്നു. ശുഭന്റെ ഹരണമാണ് ചെയ്യുന്നതെങ്കിൽ ഇവിടെ ഹരിച്ചു കിട്ടിയ ഫലത്തിന്റെ പകുതിമാത്രം കളഞ്ഞാൽ മതിയെന്നും ധരിയ്ക്കുക. ഇതാണ് ദൃശ്യാർദ്ധഹരണത്തിന്റെ ക്രിയ.