സ്ത്രീകൾക്ക് ഗർഭം സന്ധാരണക്ഷമമെന്നറിഞ്ഞാൽ 90 ദിവസം തികയും മുമ്പ് ഗർഭൗഷധം കൊടുക്കണം. "കലലഘനാംകുരാദി" നിയമപ്രകാരം 90 ദിവസമാകും മുമ്പ് കരചരണാദ്യവയവ വിഭാഗങ്ങളുടെ അംഗുരാവസ്ഥയാരംഭിക്കും. അതിനാൽ സ്ത്രീപുരുഷഭേദരൂപം ആവീർഭവിക്കും മുമ്പ് ഔഷധസേവ തുടങ്ങണം. ഔഷധസേവാരംഭത്തിനു വെളുത്തപക്ഷം മുഖ്യം. കറുത്തപക്ഷം മധ്യമം. വെളുത്തപക്ഷപൂർണ്ണാതിഥികളായ പഞ്ചമി, ദശമി, പൌർണ്ണമി മുഖ്യങ്ങളാണ്. രിക്താതിഥികൾ വർജിക്കണം. അനിഴം, അശ്വതി, പുണർതം, അത്തം, പൂരോരുട്ടാതി, ഉത്രട്ടാതി, പൂയ്യം, തിരുവോണം എന്നീ നക്ഷത്രങ്ങൾ ഉത്തമങ്ങളാണ്. ഔഷധസേവ രാത്രി ആരംഭിക്കരുത്. പകൽ തന്നെവേണം. അപരാഹ്നം സായാഹ്നം ഒഴിവാക്കണം. പ്രാതസ്സന്ധ്യ വർജിക്കണം. രാശി; ഗ്രഹസ്ഥിതി; വാരങ്ങൾ എന്നിവ പുംസവനത്തിനു പറഞ്ഞവിധം സ്വീകരിക്കണം. മുഹൂർത്തലഗ്നം ഊർദ്ധ്വമുഖരാശിയാവണം. ചന്ദ്രസ്ഥിതരാശിയുടെ 2 - 3 - 7 - 8 - 9 എന്നീ ഭാവങ്ങളും ചന്ദ്രസ്ഥിതരാശിയും സ്വീകരിക്കാം. ഉൽക്കാപാതാദിദോഷങ്ങളും; ഗുളിക വിഷ്ടിഗണ്ഡാന്തങ്ങളും; അനുജന്മനക്ഷത്രങ്ങളും ജന്മാഷ്ടമരാശിയും അതിൽ നിൽക്കുന്ന ചന്ദ്രനും; കർത്തൃദോഷങ്ങളും വർജിക്കണം.
. . ഹരിശ്രീ ഗണപതയെ നമഃ അവിഘ്നമസ്തു ശ്രീ ഗുരുഭ്യോ നമഃ നവഗ്രഹേഭ്യോ നമഃ . .
