മിത്രാരിസ്വഗൃഹഗതൈസ്തതസ്തതോർത്ഥാ-
സ്തുംഗസ്ഥേ ബലിനി ച ഭാസ്കരേ സ്വവീര്യാൽ
ആയസ്ഥൈരുദയധനാശ്രിതൈശ്ച സൌമ്യൈഃ
സഞ്ചിന്ത്യം ബലസഹിതൈരനേകധാ സ്വം.
സാരം :-
മുൻപറഞ്ഞ പ്രകാരം വിചാരിയ്ക്കുമ്പോൾ അർത്ഥദാതാവായ ഗ്രഹം (ധനം നൽകുന്ന ഗ്രഹം) ഏതാണോ ആ ഗ്രഹം തന്റെ ബന്ധുക്ഷേത്രത്തിലാണ് നിൽക്കുന്നതെങ്കിൽ മേൽപ്പറഞ്ഞ കർമ്മം ചെയ്താലുള്ള ധനലാഭം ബന്ധുക്കളിൽനിന്നും, ആ ഗ്രഹം നിൽക്കുന്നതു സമക്ഷേത്രത്തിലാണെങ്കിൽ സമനിൽ നിന്നും, ശത്രുക്ഷേത്രത്തിലാണെങ്കിൽ തന്റെ ശത്രു പക്കൽ നിന്നും, നീചരാശിയിലാണെങ്കിൽ തന്നേക്കാൾ നികൃഷ്ടജാതിയിൽപെട്ടവരിൽ നിന്നും, സ്വക്ഷേത്രത്തിലാണെങ്കിൽ അച്ഛൻ മുതലായ സ്വജനങ്ങളിൽ നിന്നും ആയിരിക്കും ധനലാഭമുണ്ടാവുക. ആ ഗ്രഹം ഉച്ചസ്ഥനാണെങ്കിൽ മുൻപറഞ്ഞ കർമ്മംകൊണ്ടും മേൽപ്പറഞ്ഞ മിത്രാദികളിൽ നിന്നുള്ള ധനലാഭം സ്വശക്തികൊണ്ടും നീചസ്ഥനാണെങ്കിൽ കേവലം യാചനംകൊണ്ടുമായിരിയ്ക്കും ധനം സമ്പാദിയ്ക്കുക. ഇതുകൊണ്ടു ശേഷം ഊഹിയ്ക്കുകയും വേണം.
സൂര്യന് ഉച്ചസ്ഥിതിയോ അല്ലെങ്കിൽ ഉച്ചം ഒഴിച്ചുള്ള മറ്റെല്ലാബലങ്ങളുമോ ഉണ്ടായാൽ മിത്രാദികളിൽ നിന്ന് സ്വശക്തികൊണ്ടുതന്നെ ധനം സമ്പാദിയ്ക്കുമെന്നു പറയണം. ഉദയലഗ്നം, അതിന്റെ 2, 11 ഈ മൂന്നു ഭാവങ്ങളിലും ബുധൻ വ്യാഴം ശുക്രൻ എന്നീ മൂന്നു ഗ്രഹങ്ങൾ നിന്നാൽ അയാൾ ചെയ്യുന്ന പ്രവൃത്തികളിലൊക്കെത്തന്നെ ഇച്ഛിച്ചതിൽ കൂടുതൽ ധനം ലഭിയ്ക്കുകയും ചെയ്യും. - " ലാഭാർത്ഥലഗ്നഗൈഃ സൌമ്യൈര്യേന യേ നൈവ കർമ്മണാ - ധനാർജ്ജനം പ്രാർത്ഥയതേ നായത്നാൽ സ്വയമശ്നുതേ" - എന്നുണ്ട്.