യമേ കുംഭേർക്കേജേ ശശിനി ഗവി തൈരേവ തനുഗൈർ-
നൃയുക്സിംഹാളിസ്ഥൈശ്ശശിജഗുരുവക്രൈർനൃപതയഃ
യമേന്ദുതുംഗേംഗേ സവിതൃശശിജൌ ഷഷ്ഠഭവനേ
തുലാജേന്ദുക്ഷേത്രൈസ്സസിതകുജജീവൈശ്ച നരപൌ.
ശനി കുംഭം രാശിയിലും സൂര്യൻ മേടം രാശിയിലും ചന്ദ്രൻ ഇടവം രാശിയിലും ബുധൻ മിഥുനം രാശിയിലും വ്യാഴം ചിങ്ങം രാശിയിലും ചൊവ്വ വൃശ്ചികം രാശിയിലും നിൽക്കുക; ഇങ്ങനെ ഗ്രഹസ്ഥിതിയുള്ളപ്പോൾ 1). കുംഭം ലഗ്നം 2). മേടം ലഗ്നം 3). ഇടവം ലഗ്നം ഇങ്ങനെ ലഗ്നഭേദേന മൂന്നു രാജയോഗങ്ങളെ കല്പിയ്ക്കാവുന്നതാണ്.
എന്നാൽ ഇപ്പോഴത്തെ കരണങ്ങൾ പ്രകാരം സൂര്യനിൽ നിന്ന് മൂന്നാം രാശിയിൽ ബുധൻ വരുന്നതല്ലാത്തതിനാൽ. 1). കുംഭലഗ്നത്തിൽ ശനി മിഥുനം രാശിയിൽ ബുധൻ, 2). മേടലഗ്നത്തിൽ സൂര്യൻ ചിങ്ങം രാശിയിൽ വ്യാഴം, 3). ഇടവലഗ്നത്തിൽ ചന്ദ്രൻ വൃശ്ചികം രാശിയിൽ ചൊവ്വ ഇങ്ങനെയാണ് യോഗങ്ങളെ കല്പിയ്ക്കേണ്ടതെന്നും ഒരു അഭിപ്രായമുണ്ട്. ഇപ്പോഴത്തെ കരണപ്രകാരം അസംഭവമായ ഗ്രഹസ്ഥിതികളെക്കല്പിച്ച് നാഭസയോഗാദ്ധ്യായാദി മറ്റു പലേടത്തും യോഗനിർദ്ദേശം ചെയ്തിട്ടുള്ളതുകൊണ്ട് ഗ്രന്ഥകർത്താവിന്റെ അഭിപ്രായം ആദ്യം പറഞ്ഞതുതന്നെയാണെന്നും തോന്നുന്നുണ്ട്. എന്നാൽ ഇങ്ങനെ ഇപ്പോൾ അസംഭവങ്ങളായ ഗ്രഹസ്ഥിതികളെക്കൊണ്ടു യോഗം കല്പിച്ചതിന്റെ കാരണത്തെ അടുത്ത അദ്ധ്യായത്തിലെ ആറാം ശോകവ്യാഖ്യാനത്തിൽ വിവരിക്കുന്നതുമുണ്ട്.
ശനി തുലാം രാശിയിലും ചന്ദ്രൻ ഇടവം രാശിയിലും സൂര്യബുധന്മാർ കന്നി രാശിയിലും ശുക്രൻ തുലാം രാശിയിലും ചൊവ്വ മേടം രാശിയിലും വ്യാഴം കർക്കടകം രാശിയിലും നിൽക്കുമ്പോൾ 1). തുലാം ലഗ്നമായാൽ 2). ഇടവം ലഗ്നമായാൽ ഇങ്ങനെ ലഗ്നഭേദേന രണ്ടു രാജയോഗങ്ങളെ കല്പിയ്ക്കേണ്ടതുമാണ്.
