ഉപനയിക്കുന്ന ബാലന്റെ പിറന്നാൾ - ജന്മനക്ഷത്രം ഉപനയനത്തിനു വർജിക്കണം. ഉപനയിപ്പിക്കുന്ന ആചാര്യന്റെ ജന്മലഗ്നാൽ അഷ്ടമവും ജന്മനക്ഷത്രത്തിന്റെ അഷ്ടമരാശിക്കൂറും പ്രത്യേകം ഉപനയനത്തിനു വർജ്ജിക്കണം. വിശേഷാൽ ഉപനയന മുഹൂർത്തലഗ്നത്തിന്റെ പന്ത്രണ്ടാം ഭാവത്തിൽ സൂര്യൻ നിൽക്കുകയും ആ സൂര്യനെ ബലവാനായ ചൊവ്വ ദൃഷ്ടിചെയ്യുകയുമുണ്ടായാൽ അത് ആചാര്യന്റെ ദൃഷ്ടിക്കു അന്ധതയുളവാക്കുന്ന യോഗമാണ്.
വ്യയസ്ഥമർക്കൊഭൂപുത്രഃ പശ്യേദ്യതിബലാന്വീത
തർഹ്യാചാര്യോ ചിരേണാന്ധോ ഭവേ ദിതിബുധാവിദുഃ
എന്നതിന് വിധി. ഇതിനു സമസപ്തമ ദൃഷ്ടി തന്നെ സ്വീകരിക്കണം. സൂര്യന്റെ ഏഴാം ഭാവത്തിൽ തന്നെ ചൊവ്വ വരണമെന്നർത്ഥം.