പൃഥുലനയനവക്ഷാ വൃത്തജംഘോരുജാനുർ-
ജ്ജനകഗുരുവിയുക്തഃ ശൈശവേ വ്യാധിതശ്ച
നരപതികുലപൂജ്യഃ പിംഗലഃ ക്രൂരചേഷ്ടോ
ഝഷകുലിശഖഗാംകഃ ഛന്നപാപോƒളിജാതഃ
ജനനസമയത്തു ചന്ദ്രൻ വൃശ്ചികം രാശിയിൽ നിന്നാൽ കണ്ണുകൾക്കും മുഖത്തിനും ധാരാളം വലുപ്പമുണ്ടാവുക; തുടകൾ, മുട്ടുകൾ, കണങ്കാലുകൾ എന്നീ ഭാഗങ്ങൾ വൃത്താകൃതിയിലിരിക്കുക; കുട്ടിക്കാലത്തു തന്നെ അമ്മ, അച്ഛൻ, ഗുരുനാഥൻ ഇവരെയൊക്കെ വേർപിരിയേണ്ടിവരികയും, കുട്ടിക്കാലത്ത് ദീനക്കാരനായിരിക്കുകയും (രോഗി) ചെയ്ക; സകല രാജാക്കന്മാരാലും പ്രഭുക്കന്മാരാലും പൂജിയ്ക്കത്തക്ക യോഗ്യനായിരിക്കുക; ദേഹം പിംഗളവർണ്ണമായിരിക്കുക; അടിക്കുക, കൊല്ലുക മുതലായ ഏതു ക്രൂരകർമ്മങ്ങളേയും പ്രവർത്തിയ്ക്കുക; ചന്ദ്രൻ നിൽക്കുന്നത് വൃശ്ചികം രാശിയുടെ പ്രഥമദ്രേക്കാണത്തിലാണെങ്കിൽ മത്സ്യത്തിന്റേയും, മദ്ധ്യദ്രേക്കാണത്തിലാണെങ്കിൽ വജ്രമെന്ന ആയുധത്തിന്റേയും, അന്ത്യദ്രേക്കാണത്തിലാണെങ്കിൽ പക്ഷിയുടേയും ആകൃതിയിലുള്ള രേഖ; ഉള്ളങ്കയ്യ്, കാലടി മുതലായ അവയവത്തിന്മേലുണ്ടായിരിക്കുക; പാപകരമായ പ്രവൃത്തി ചെയ്യുകയും എന്നിട്ട് അതിനെ മറച്ചുവെക്കുകയും ചെയ്ക - ഈ ഫലങ്ങളൊക്കെ അനുഭവപ്പെടുന്നതാകുന്നു.