ദ്യൂതാന്നപാനരതനാസ്തികചോരനിസ്സ്വഃ
കുസ്ത്രീകകൂടകൃദസത്യരതഃ കുജർക്ഷേ
ആചാര്യഭൂരിസുതദാരധനാർജ്ജനേഷ്ട-
ശ്ശൌക്രേ വദാന്യഗുരുഭക്തിയുതശ്ച സൌമ്യേ.
സാരം :-
ജനനസമയത്ത് ബുധൻ മേടം രാശിയിലോ വൃശ്ചികം രാശിയിലോ നിന്നാൽ, ചൂതുകളിയും ഭക്ഷണപാനാദികളുമല്ലാതെ മറ്റൊരു പ്രവൃത്തിയും ചെയ്യാത്തവനും, കാണാവുന്നതും പ്രത്യക്ഷത്തിൽ അനുഭവപ്പെടാവുന്നതുമല്ലാതെ ഈശ്വരനോ പരലോകാദികളോ സുകൃതദുഷ്കൃതങ്ങളോ ഒന്നുമില്ലെന്നു ദൃഢമായി വിശ്വസിയ്ക്കുന്നവനും, അന്യനെ വഞ്ചിച്ച് പരദ്രവ്യത്തെ അപഹരിയ്ക്കുന്നവനും, ദരിദ്രനും പലവിധത്തിലും നിന്ദിയ്ക്കപ്പെട്ടവളായ ഭാര്യയോടുകൂടിയവനും, അനേകം മായകളേയും ദുഷ്കൃത്യങ്ങളേയും അനുഷ്ഠിച്ച് അവയൊക്കെ മറച്ചുവെച്ച് ധാർമ്മികനെന്നു നടിയ്ക്കുന്നവനും, വ്യാജമേ പറയൂ എന്നു നിശ്ചയമുള്ളവനുമായിരിയ്ക്കും.
ജനനസമയത്ത് ബുധൻ ഇടവം രാശിയിലോ തുലാം രാശിയിലോ നിന്നാൽ, വിദ്യോപദേഷ്ടാവായ ആചാര്യനിലും ഗുരുഭൂതന്മാരായ അച്ഛൻ അമ്മ മുതലായവരിലും ഭക്തിയുള്ളവനും എപ്പോഴും ധനാർജ്ജനത്തിൽ താല്പര്യമുള്ളവനും, അനേകം ഭാര്യാസന്താനങ്ങളുള്ളവനും ദാന ശീലനുമായിത്തീരുന്നതാണ്.
