ചൊവ്വ ചിങ്ങം ധനു മീനം കുംഭം മകരം രാശികളിൽ നിന്നാലത്തെ ഫലം പറയുന്നു

നിസ്സ്വഃ ക്ലേശസഹോƒഭയോ വനചര-

സ്സിംഹേƒല്പദാരാത്മജോ

ജൈവേ നൈകരിപുർന്നരേന്ദ്രസചിവഃ

ഖ്യാതോഭയോƒല്പാത്മജഃ

ദുഃഖാർത്തോ വിധനോടനോനൃതരതി-

സ്തീക്ഷ്ണശ്ച കുംഭസ്ഥിതേ

ഭൌമേ ഭൂരി ധനാത്മജോ മൃഗഗതേ

ഭൂപോƒഥ വാ തത്സമഃ

സാരം :-

ജനനസമയത്ത് ചൊവ്വ ചിങ്ങം രാശിയിൽ നിന്നാൽ, ദരിദ്രനും ഏതു ദുഃഖത്തേയും സഹിയ്ക്കുന്നവനും പേടിയില്ലാത്തവനും അധികവും കാടുകളിൽ സഞ്ചരിയ്ക്കുന്നവനും ഭാര്യാസന്താനങ്ങൾ കുറഞ്ഞവനുമായിരിയ്ക്കും.

ജനനസമയത്തു ചൊവ്വ ധനു രാശിയിലോ മീനം രാശിയിലോ നിന്നാൽ അനേകം ശത്രുക്കളുള്ളവനും രാജമന്ത്രിയും പ്രസിദ്ധനും ഭയരഹിതനും അല്പസന്തതിയുള്ളവനുമായിരിയ്ക്കുന്നതാണ്.

ജനനസമയത്ത് ചൊവ്വ കുംഭം രാശിയിൽ നിന്നാൽ അതിവ്യസനത്താൽ ദുഃഖിക്കുന്നവനും ദരിദ്രനും സദാ സഞ്ചാരശീലനും അസത്യമേ പറയൂ എന്നു നിർബ്ബന്ധമുള്ളവനും അതിക്രൂരനുമായിരിക്കും.

ജനനസമയത്ത് ചൊവ്വ മകരം രാശിയിൽ നിൽക്കുന്നതു അത്യുച്ചം കഴിയുന്നതിനു മുമ്പാണെങ്കിൽ, രാജാവോ രാജതുല്യനോ ആവുമെന്നും അത്യുച്ചാനന്തരമാണെങ്കിൽ വലിയ ധനികനും വളരെ സന്താനങ്ങളുള്ളവനുമാകുമെന്നും അറിയുകയും വേണം.