സൂര്യനു ചന്ദ്രാദിഗ്രഹങ്ങളുമായിട്ടുള്ള യോഗങ്ങളുടെ ഫലത്തെ പറയുന്നു

തിഗ്മാംശുർജ്ജനയത്യുഷേശസഹിതോ

യന്ത്രാശ്മകാരം നരം

ഭൌമേനാഘരതം ബുധേന നിപുണം

ധീകീർത്തിസൌഖ്യാന്വിതം

ക്രൂരം വാക്പതിനാന്യകാര്യനിരതം

ശുക്രേണ രംഗായുധൈർ-

ല്ലബ്ധസ്വം രവിജേന ധാതുകുശലം

ഭാണ്ഡപ്രകാരേഷു വാ.

സാരം :-

ജനനസമയത്തു സൂര്യൻ ചന്ദ്രനോടുകൂടിയാണു നിൽക്കുന്നതെങ്കിൽ അയാൾ പലവിധ പ്രവൃത്തികൾ ചെയ്യേണ്ടതിന്നും അനേകവിധത്തിലുള്ള ജ്ഞാനസമ്പാദനത്തിനും ഉപകരിക്കുന്ന വിവിധ യന്ത്രങ്ങളെ ഉണ്ടാക്കുകയും കരിങ്കല്ലുകൊണ്ടു പലതരം പ്രവൃത്തികൾ ചെയ്കയും ചെയ്യുന്നതാണ്.

ജനനസമയത്തു സൂര്യൻ ചൊവ്വയോടുകൂടിയാണ് നിൽക്കുന്നതെങ്കിൽ പാപകർമ്മങ്ങളിൽ ആസക്തിയുള്ളവനായിരിക്കും.

ജനനസമയത്തു സൂര്യൻ ബുധനോടുകൂടിയാണ് നിൽക്കുന്നതെങ്കിൽ സകല പ്രവൃത്തികളിലും സാമർത്ഥ്യം ബുദ്ധി ലോകപ്രസിദ്ധി മനസ്സന്തോഷം എന്നിവകളോടുകൂടിയവനായിരിക്കും.

ജനനസമയത്തു സൂര്യൻ വ്യാഴത്തോടുകൂടിയാണ് നിൽക്കുന്നതെങ്കിൽ ദയയില്ലാത്തവനും സ്വന്തം കാര്യങ്ങളിൽ അലസനും പലകാര്യനിരതനുമായിരിക്കും. വ്യാഴം ബലഹീനനാണെങ്കിൽ നിർദ്ദയത്വം, ബലവാനാണെങ്കിൽ പലകാര്യനിരതത്വമാണു അനുഭവിക്കുക എന്നും ഒരു അഭിപ്രായമുണ്ട്.

ജനനസമയത്തു സൂര്യൻ ശുക്രനോടുകൂടിയാണ് നിൽക്കുന്നതെങ്കിൽ ആടുക, പാടുക അഭിനയിക്കുക നൃത്തംവെക്കുക അഭ്യാസങ്ങൾ കാണിക്കുക മല്ലുപിടിക്കുക ഇത്യാദികളായ രംഗവിദ്യകളേകൊണ്ടും വില്ല് അമ്പ് വാള് മുതലായ ആയുധവിദ്യകളേക്കൊണ്ടും ധനം സമ്പാദിക്കും.

ജനനസമയത്തു സൂര്യൻ ശനിയോടുകൂടിയാണ് നിൽക്കുന്നതെങ്കിൽ സ്വർണ്ണം വെള്ളി ഈയം മുതലായ ശുദ്ധലോഹങ്ങളുടേയും ഓട് പിച്ചള മുതലായ കൂട്ടുലോഹങ്ങളുടേയും ഹരിതാലം മനയോല ഗന്ധകം ആദിയായ ധാതുദ്രവ്യങ്ങളുടേയും നിർമ്മാണത്തിലും, അവയെക്കൊണ്ടു പലവിധം പ്രവൃത്തിചെയ്യുന്നതിലും, സാമർത്ഥ്യമുള്ളവനായിരിക്കും. അല്ലെങ്കിൽ സ്വർണ്ണം ചെമ്പ് ഇരുമ്പ് മുതലായ ലോഹങ്ങൾകൊണ്ടോ മണ്ണ് മുതലായവകളെകൊണ്ടോ മരംകൊണ്ടോ മറ്റോ പാത്രങ്ങളുണ്ടാക്കുകയും അവകൊണ്ടു വ്യാപരിക്കുകയും ചെയ്യുന്നതിൽ സമർത്ഥനായെന്നും വരാം.

ചന്ദ്രാദികൾക്കു (ചന്ദ്രൻ മുതലായ ഗ്രഹങ്ങൾക്ക്‌) സൂര്യനോടു അടുക്കുമ്പോൾ മൌഢ്യവും അതു നിമിത്തം മേൽപറഞ്ഞ ഫലങ്ങൾക്കു വൈകല്യവും ഒട്ടുംതന്നെ സംഭവിക്കുന്നതല്ലെന്നും, നേരെമറിച്ച്, അകന്നാലാണ് ഫലത്തിനു അപൂർണ്ണതയുണ്ടാവുകയെന്നും ഓർമ്മ വെയ്ക്കേണ്ടതുമാണ്.