സ്വയമധിഗതവിത്തഃ പാർത്ഥിവസ്തൽസമോ വാ
ഭവതി ഹി സുനഭായാം ധീധനഖ്യാതിമാംശ്ച
പ്രഭുരഗദശരീരശ്ശീലവാൻ ഖ്യാതകീർത്തിർ-
വ്വിഷയസുഖസുവേഷോ നിർവൃതശ്ചാനഭായാം.
സാരം :-
സുനഭായോഗത്തിൽ ജനിച്ചവൻ യോഗകർത്താക്കന്മാർ ബലവാന്മാരാണെങ്കിൽ രാജാവും, സാമാന്യബലവാന്മാരാണെങ്കിൽ രാജതുല്യനുമായിരിയ്ക്കും. രാജാവായാലും തത്തുല്യനായാലും ശരി, അയാൾ വേണ്ടത്തക്ക ധനം സ്വപ്രയത്നംകൊണ്ടുതന്നെ സമ്പാദിക്കുന്നവനും ധനികനും ബുദ്ധിമാനും യശ്വസിയുമായിരിയ്ക്കയും ചെയ്യും.
അനഭായോഗജാതൻ അന്യന്മാർക്കു തടുക്കുവാൻ കഴിയാത്തവിധം ആജ്ഞാശക്തിയുള്ളവനും ആരോഗ്യദൃഢഗാത്രനും, സുശീലനും, വലിയ യശ്വസിയും, വിഷയസുഖങ്ങളെ വേണ്ടവിധം അനുഭവിയ്ക്കുന്നവനും സ്നാനലേപനാദികളെക്കൊണ്ടു നല്ലപോലെ അലങ്കരിച്ചവനും, സുഖദുഃഖാദികളിൽ മനശ്ചാഞ്ചല്യമില്ലാതെ എല്ലായ്പോഴും സമാധാനചിത്തത്തോടുകൂടിയവനുമായിരിയ്ക്കുന്നതാണ്.