ധർമ്മമാർഗ്ഗനിരതിർവ്വിപശ്ചിതാം
സംഗമോ വിമലധീർദ്ധനം ദ്വിജാൽ
വിദ്യയാ ബഹുയശസ്സുഖം സദാ
ചന്ദ്രജേ ഹരതി വത്സരം സ്വകം.
സാരം :-
ബുധദശയിലെ ബുധന്റെ അപഹാരകാലം ധർമ്മകാര്യങ്ങളിൽ താല്പര്യവും വിദ്വാന്മാരുമായി ചേർച്ചയും ബുദ്ധിക്കു പ്രകാശവും വിപ്രക്ഷത്രിയവൈശ്യന്മാരിൽനിന്നു ധനലാഭവും വിദ്യയും തന്നിമിത്തം മഹത്തായ കീർത്തിയും സുഖവും ഫലമനുഭവിക്കും.
ബുധനു ദ്വിതീയ സപ്തമങ്ങളായ മാരകസ്ഥാനങ്ങളിൽ സ്ഥിതിയോ തൽഭാവാധിപത്യമോ അഷ്ടമഭാവസംബന്ധമോ മറ്റ് അനിഷ്ടമോ ഉണ്ടായിരുന്നാൽ വിഷ്ണുപൂജയും സഹസ്രനാമജപവും ശാന്തി ഹോമങ്ങളും യഥാശക്തി ചെയ്കയും വേണം.