സുഹൃദരിപരകീയ സ്വർക്ഷതുംഗസ്ഥിതാനാം
ഫലമനുപരിചിന്ത്യം ലഗ്നദേഹാദിഭാവൈഃ
സമുപചയവിപത്തീ സൌമ്യപാപേഷു സത്യഃ
കഥയതി വിപരീതം രിഃഫഷഷ്ഠാഷ്ടമേഷു.
സാരം :-
1). ബന്ധുക്ഷേത്രം 2). ശത്രുക്ഷേത്രം 3). സമക്ഷേത്രം 4). സ്വക്ഷേത്രം 5). ഉച്ചം ഈ അഞ്ചിൽ ഓരോ സ്ഥാനത്തു നിൽക്കുന്നവർക്കും എത്ര വീതം ഫലമുണ്ടെന്നു അടുത്ത ശ്ലോകംകൊണ്ടു പറയുന്നുണ്ട്. ഗ്രഹങ്ങൾ നിൽക്കുന്നതു ഏതു ഭാവത്തിലായാലും ഇതുപ്രകാരം നോക്കുമ്പോൾ ഓരോ ഗ്രഹത്തിനും എത്ര ഫലമുണ്ടോ അതു നിൽക്കുന്ന ഭാവംകൊണ്ടു വിചാരിയ്ക്കപ്പെടാവുന്ന പദാർത്ഥത്തെ സംബന്ധിച്ച് അത്ര ശുഭാശുഭഫലങ്ങളേയാണ് ആ ഗ്രഹം അനുഭവിപ്പിയ്ക്കുക. ഇതിനു ആ ഗ്രഹം ശുഭനെന്നോ പാപനെന്നോ ഒട്ടു ഭേദവുമില്ല.
ശുഭഗ്രഹങ്ങൾ ഭാവഫലങ്ങൾക്കു പുഷ്ടിയേയും പാപഗ്രഹങ്ങൾ നാശത്തേയുമാണ് ചെയ്യുക എന്നും, ആറ് എട്ട് പന്ത്രണ്ട് എന്നീ ഭാവങ്ങളിൽ നിൽക്കുന്ന ശുഭഗ്രഹങ്ങൾ ആ ഭാവങ്ങളുടെ നാശവും പാപഗ്രഹങ്ങൾ പുഷ്ടിയും ചെയ്യുമെന്നും സത്യാചാര്യർ പറയുന്നുണ്ട്.
" സൌമ്യാഃ പുഷ്ടിം പാപാസ്തദ്ധാനിം സംശ്രിതാ ഗ്രഹാഃ കുര്യുഃ മൂർത്ത്യാദിഷു നിധനേƒന്ത്യേ ഷഷ്ഠേ ച വിപര്യയാത് ഫലദാഃ. "
എന്നിങ്ങിനെ സത്യാചാര്യവചനവുമുണ്ട്