ജായാന്വിതോ ബലവിഭൂഷണസത്വയുക്ത-
സ്തേജോതിസാഹസയുതശ്ച കുജേ സ്വഭാഗേ
രോഗീ മൃതസ്വയുവതിർവ്വിഷമോന്യദാരോ
ദുഃഖീ പരിച്ഛദയുതോ മലിനോƒർക്കപുത്രേ.
സാരം :-
ജനനസമയത്തു ചൊവ്വ തന്റെ ത്രിംശാംശകസ്ഥനായാൽ, ഭാര്യയോടും ബലത്തോടും അലങ്കാരങ്ങളോടും തേജസ്സോടും അത്യുത്സാഹത്തോടും സുഖദുഃഖങ്ങളിൽ നിർവ്വികാരതയോടും കൂടിയവനായിരിയ്ക്കും.
ശനി സ്വത്രിംശാംശകസ്ഥിതനായാൽ, നിത്യരോഗം, വിഷമസ്വഭാവം, പരദാരാസക്തി, അതിവ്യസനം, ധാരാളം ഗൃഹവസ്ത്രാദ്യുപകരണങ്ങൾ, ദേഹവസ്ത്രാദികളിൽ ഏറ്റവും മാലിന്യമുണ്ടായിരിയ്ക്കുക എന്നീ ഫലങ്ങൾക്ക് പുറമേ വിവാഹാനന്തരം ഉടൻതന്നെ ഭാര്യ മരിയ്ക്കുകയും ചെയ്യും.