മേഷൂരണായതനുഗാശ്ശശിമന്ദജീവാ
ജ്ഞാരൌ ധനേ സിതരവീ ഹിബുകേ നരേന്ദ്രഃ
വക്രാസിതൌ ശശിസുരേഡ്യസിതാർക്കസൌമ്യാ
ഹോരാസുഖാസ്തശുഭഖാപ്തിഗതാഃ പ്രജേശഃ
സാരം :-
1). ലഗ്നാൽ പത്താം ഭാവത്തിൽ ചന്ദ്രനും, പതിനൊന്നാം ഭാവത്തിൽ ശനിയും ലഗ്നത്തിൽ വ്യാഴവും അതിന്റെ രണ്ടാം ഭാവത്തിൽ കുജബുധന്മാരും നാലാം ഭാവത്തിൽ ആദിത്യശുക്രന്മാരും*. 2). ലഗ്നത്തിൽ കുജമന്ദന്മാരും ലഗ്നാൽ നാലാം ഭാവത്തിൽ ചന്ദ്രനും ഏഴാം ഭാവത്തിൽ വ്യാഴവും ഒമ്പതാം ഭാവത്തിൽ ശുക്രനും പത്താം ഭാവത്തിൽ സൂര്യനും പതിനൊന്നാം ഭാവത്തിൽ ബുധനും നിൽക്കുക. ഈ രണ്ടു രാജയോഗങ്ങളിൽവെച്ച് ഒരു രാജയോഗത്തിൽ ജനിച്ചതു രാജപുത്രനാണെങ്കിൽ അയാൾ രാജാവായിത്തീരുന്നതാണ്. അന്യവംശജനാണെങ്കിൽ ധനികനും പ്രഭുവുമായിത്തീരുകയും ചെയ്യും.
മുകളിലെ രണ്ടു യോഗങ്ങളിൽ ഒന്നാമത്തേതിൽ ഇപ്പോഴത്തെ കരണപ്രകാരം അസംഭവമായ ഗ്രഹസ്ഥിതി ഉണ്ടാകയാൽ ആ യോഗത്തെ ഇതിനു താഴെ പറയും പ്രകാരം ചിലർ വ്യാഖ്യാനിച്ചു കാണുന്നുണ്ട്. ലഗ്നത്തിൽ വ്യാഴം പതിനൊന്നാം ഭാവത്തിൽ ശനി പത്താം ഭാവത്തിൽ ചന്ദ്രൻ ഇതിനുപുറമേ ലഗ്നാൽ രണ്ടാം ഭാവത്തിൽ കുജബുധന്മാരോ അല്ലെങ്കിൽ ലഗ്നാൽ നാലാം ഭാവത്തിൽ ആദിത്യശുക്രന്മാരോ നിൽക്കുക. ഇങ്ങനേയാണ് യോഗലക്ഷണമെന്നാണ് ഇവർ പറയുന്നത്/
--------------------------------------------------------------
* ആദിത്യശുക്രന്മാർ ഇത്ര അകന്നുവരുന്നതല്ല. ഇതിന്റെ സമാധാനം ഈ അദ്ധ്യായത്തിലെ നാലാം ശ്ലോകവ്യാഖ്യാനത്തിൽ പറഞ്ഞിട്ടുണ്ട്.
